Ny Peniko

MPIVAROTENA

Alina no androny
ny alina madiva...aminy dia vola
hanefainy ny atoandrony

Fa alina no asany
indrindra ny alin'ny ririna
marobe reo mangatsiaka
mila azy ho fihinina
eny anjoronjoron'hirika
hianoka ny hafanany
sy ny nofy nofo mielina
apongatry ny vatany

Dia ekeny ny hoviraina
tera-dinitra ny tavany
miontsokontsona ny tratrany
misefosefo koa ny vavany

anefa...

Tsy ilàny fiantrana
ny anton-diany hikarama
ny hany azonao atao
rehefa vita izay natao
DIA NY VOLA NO APETRAHO

Fa miandry izao ny zanany
Miandry koa ny akaniny

Ny Peniko, 13 febroary 2012

NIFY DIMY

Raha tahiany misy tsiky
Heverinao fa ho ahy irery
Dia apetaho lay solonify
Fa tsy vitako ny hijery
ny vavanao misokasoka
mangodana tsisy endriny

Izay aminao dia tena laniko
Raha mikombona ny vava
Fa mahadiso ny adisaniko
Rehefa injay lay tsiky banga
no miainga manodoka
ndeha hamboraka ny heviny

Ny bikanao moa tsara rafitra
Mitsatoka tsy misy tsiny
Ny indrokely hoy ny mpandrafitra
Ny nifinao tsy ampy dimy

Ny Peniko, 12 febroary 2012

FA MATOA…

matoa ianao nidify
dia fantatro mihitsy
fa tsy zakanao
ny vaiky ny sotako

matoa ianao nanolo
dia satria ny tontolo
nampiainako anao
feno ny haromotako

Fa matoa ianao niverina
dia satria nahatelina
ilay fanahy fizarako

ary matoa ianao tonga
dia navesatra fanonja
tam-ponao lay fitiavako

Ny Peniko, 15 janoary 2012

MIRARY...

Ny siotsiokam-boronkely
mifaliavanja raha maraina
ny akon'ny riana
mamakivaky,...
iny kizon'ala iny
mandrotsy ny voahary
any andohasaha mangina
no ataoko solon-kira
ampombaiko firariana
hirariako anao
hahatratra soa ny taom-baovao
...
hivalonan'ny tsy nety
hahamoana ny tsy fahombiazana
hisondrotanao Mpietry
ka hahatonga anao ho tazana
eny anivonivon-kintana
hahatò reo nofinofy
sy reo revirevinao
tao an'alina mangina
koa dia mirary indrindra
mirary ho anao
ny taona vaovao
ho taom-pitahiana

NY PENIKO 28 desambra 2011

TALAHO...

Andriamanitra ô!
izay anjarako anio
raha mety Ianao dia avilio
ho an'ireo kamboty ireo

Ny tandrifin'hafanako
hanomezo, tsinjarao
hifalian'ireo mahantra
mitampify an-tranobongo

Izay sombim-pahafahako
anapilaho ho azy koa
hiposahan'ny masoandrony
ahitany ny hazavana

Fa ny vaingam-pahantrako
aza aseranao akory
eo ambany takolany
fa animbino kely
ho lanjain'ireo mahery

NY PENIKO, 30 janoary 2012

FIVAVAKO

Tia anao aho Rahavako…
dia izao no fivavako
ho Tia anao
amin'ny fo, fanahy, saiko
ho Tia anao
hatramy farafofonaiko
ho tia anao
…
ka ny androm-pahavelomako
tsy mba misy hanesorako
fa hitiavako anao
…tia anao aho!!!
tena tia,
tena tia…ka
matokia!

NY PENIKO – 02 desambra 2011

IZA...?

Fa iza moa ianao?
iza... mba lazao
mitady hambabo izany foko
zay efa manan-tompo

Satria ny zavatra tsaroako
rehefa mifanojo isika
dia misy hery miampita
alefanao ami-fijery
dia tsapako mamerivery
izay efa nivoadiko

Ka iza moa ianao?
iza... mba lazao
no mitady hanafotr'ahy
r'ilay mpakafanahy

NY PENIKO 26 novambra 2011

... ialahy !!!

maditra hono ialahy
mpifoka,
mpigoga,
mpiloka,
tsy vitan'izany
fa olo-tia ady
ary ambonin'izany
mpanitsa-bady

nefa anie,...
ny fijeriko an'ialahy
toa mba olon'ny fanahy
toa olona tsotra
mandeha sy mizotra
ami-lala-mahitsy
F'ilay fandrefesany angamba no diso
na ny fony mihitsy no efa misy kitro

Fa rehefa tena nohadihadiako
hay!!! sipa voadonan'ialahy tany ho any
fa mbola mahatsiaro ny kaso-bilany
mbola mikiky lay fery ao anaty
dia manaratsy no ataony ho valifaty

NY PENIKO 18 novambra 2011

VAVAKA

Tompo ô!

Omeo hery aho anio
hahaizako miondrika
hijery ireo madinika
resy sy jambena

Amorony fo madio
manaiky ny hietry
afaka mandinika
ny lalam-pamonjena

Androtsahinao Fanahy
handreseko ny ambom-poko
hisainako ny hafa
hanaovako asa tsara

Mba ho tena lehilahy
hiasa sy hampandroso
hanarina ny lasa
amim-po mahay mizara

NY PENIKO 5 novambra 2011

MATY

Navelako noraisiny
Sady nohakakaisiny
Ireo tanan-dreniny

Navelako ho lazainy
Izay rehetra tao an- tsainy
Fa tsy hisy hafeniny

Fa anio no andro farany
Hanononana ny anarany
Dia tsy ho hita intsony

Anio no andro farany
Ahitany izany tavany
Toa renoky ny Tory

NY PENIKO 19 septambra 2011

ANGAMBA...

Angamba...
Tsy ny lanitra manga
na ny hakanton'ny maraina
tsy izay somboniaina
no mahamirana ny saiko
fa ianao anilako eo

Angamba...ilaiko ihany
ny taratr'andro eny antsinanana
ny diavolam-penomanana
saingy...
ho malok'ila ihany
ny fiainako eto an-tany
raha toa lavitra anao

NY PENIKO 8 novambra 2011

SARO-PIARO

Notapenany ny vavako
tsy hizara tsikitsiky
tsy hiloa-peo mihitsy
Afa-tsy aminy ihany

Nojambainy koa masoko
tsy hijerijery hafa
tsy afaka hikasa
afa tsy izy irery ihany

Dia talanjona ny foko
raha nanala antsokosoko
ity tampina napetrany

Hay iny tsikiko iny
raha sendra mba mivily
tsy mba fahafinaretany

Hay ny masoko nirirana
nijery vilambilana
nanimba ny fiheverany

Dia ny feoko mba nikalo
nampiherika mpandalo
mbola tiany ho feperana

NY PENIKO 14 oktobra 2011

SATRIKO RY SAMPIKO

malalako,…
mba satriko
hanonona tsy miato
ny anaranao
hijery tsy ankijanona
ny salovanao
hiaina tena ela
ny tsikitsikinao

mba satriko,
malalako,…
banjininao maharitra
amin'ireo masonao
hahare matetika
izany feonao
hizara isanandro
fitiavana aminao

mba satriko e!
mba satriko…
ry Tiako sady sampiko
ho feno anao ny amiko

NY PENIKO 27 novambra 2011

MATOKIA !!!

kanefa matokia...
fa izy dify iny
mbola hiverin'eto ihany
hanova ny anio
ho andro vaovao

NY PENIKO 13 novambra 2011

:::: 50 taona ::::

50 taona hono
50 taona izay
no nambara f'efa afaka

nefa...

50 taona koa
50 taona indray
nivarinana an-davaka

NY PENIKO 17 novambra 2011

MANTALIA

Harivariva tamin'ny dimy
masoandro mody andrefan'iny
Andeha hatsaka no nialana
Nierana tao an-trano

Niova tampoka ny dia
ho ery ambody mantalia
eo no mifanorokoroka
mifanaikinaiki-molotra

Mbola ao hatramin'izao
ny anarako sy anaranao
lay nosokirina fahiny
Mbola ao tokoa lay diany

Inoako fa tsaroanao
harivariva toy izao
nifampisioka haka rano
hay fantatry ny tao an-trano

Isika roa moa tsy nahalala
fa nentin'ity fo adala
Ho eny am-body mantalia
hifamboraka fitia

KANJO!!!!!!

Hay dadanao dia efa niandry
miaraka amin'ny langilangy
Dia nitsoaka aho nandositra
tsemboka aho, tera-kovitra

Tsiahy iny mba nandalo
Dia narindra ho tononkalo

Raha manam-potoana ianao
Mandalova any izao
fa tena mbola ao tokoa
lay anaran-tsika roa

NY PENIKO 19 septambra 2011

RANOMANITRA

Niady mivady
Vao maraindraina
Ry zareo tato atsimo

Ny zanany vavy
No teo nitaraina
Dia izay aho vao nino

F'ilay rangahy
Toa tsotsotra ihany
Fa tsy be resaka firy

Fa madama indray
Tsy torak'izany
Fa be tafasiry

Dia nanontaniako
Ilay zazavavy
Hoe inona no antony

Nahatonga ny ady
Tamin'izy mivady
Ka namoa-tsampona

Dia namaly Rakala
Sady nisento
No tsy te hilaza

Fa nisy fofona manitra
Manentoento
Ny akanjon'ny Dada

NY PENIKO 29 jolay 2011

TSY IANAO...

Tsy haninona ny tany
raha toa ka banga anao

Tsy hampiova lokon'andro
ny fahalasananao

Tsy haharitra ony akory
ny tsy fiverenanao

Fa vao maik'aza hampitony
ny oram-baratra mitrao

NY PENIKO 27 oktobra 2011

RAHA...

Raha lazaina ho nofy ihany
izao hita rehetra izao
Dia tohanako tsy hiodina intsony ny tany
Mba ho alina foana hanofisako anao

Raha ankamantatra indray ny ampitso
mety tsy ho hita sy saro-patarina
Dia tokana ihany ny setriny omeko
ianao dia ianao no lay valiny marina

Raha toa indray ka angano sy arira
ilay tantara niarahantsika roa
Dia mahatoky sy mino aho fa maro no liana
hamerina hihaino fa tsy afa- po

NY PENIKO 7 oktobra 2011